Thet Tant Hlwar (သက်တန့်လွှာ)

ပြောပြချင်တယ်  ဒီကနေ့ အဆင်ပြေတဲ့အကြောင်းလေး  ..... ပြောပြချင်တယ် ဒီကနေ့ နေသာတဲ့အကြောင်းလေး ..... ပြောပြချင်တယ် ဒီကနေ့ စိတ်ကြည်လင်နေတဲ့အကြောင်းလေး ..... ပြောပြချင်လို့ ဒီလိုပဲ သာယာတဲ့ လမ်းလေးပေါ်  အလိုက်သင့်လေး လျှောက်နေဆဲပဲလို့လေ ..... ပြောပြချင်သေးတယ် ဒီလိုလေး လျှောက်နိုင်ဖို့ ဝါယမလေးတော့ စိုက်ခဲ့တယ်ဆိုတာကိုပေါ့ .....။ (၁၉.၀၆.၂၀၂၀) ရန်ကုန်။ 

ငါ့မေတ္တာများက တခမ်းတနားနဲ့ ကြိုးစားသလောက် အရာထင်ခဲ့လို့ မမျှော်လင့်ခဲ့သော အသိအမှတ်ပြုခြင်းများ ငါလေပွေ့ဖက်လို့ ယုံကြည်အင်အားတို့ ယိုင်နဲ့ မသွားဖို့ ငါလေ အကြိမ်ကြိမ် အားတင်းလို့ ‌ရှေ့ဆက်ခရီးတွက် ခံယူချက်တို့လည်း ပြောင်းလဲမသွားဖို့ ...... (26.9.2019) YGN

ဘဝက ချိုပေါ့ကျဆိမ့် တစ်ခွက်လို ဒုက္ခက လှလှနဲ့ မိတ်ဖက်ကပြုလို့ .................... သွားရာလမ်းမှာ မိုးလိုက်လို့ရွာသတဲ့ ......... အထူအပါးနားမလည် ခဲ့ရာက ဟိုးရှေ့ တစ်လံလောက်ထိ ကွက်ကျော်မြင်လာ‌အောင် ဘဝကများများ သင်ပေးခဲ့တာပဲ..... မှားရင်း ပြင်ရင်းနဲ့ ဘဝတိုတိုက တဖြည်းဖြည်း အဓိပ္ပါယ်တွေ ပြောင်းလာနေပြီ ....... မရှိတာထက် မသိတာခက် အသိခေါက်ခက် အဝင်နက် တစ်ပါးသူနှာခေါင်းပေါက်နဲ့ ဒီလေတွေကို မရှူသွင်းလို........ လွတ်လပ်စွာပဲ ကိုယ့်ကြမ္ပာ ကိုယ်ဖန်တီး ကိုယ့်လမ်းကိုယ်ပဲ ရှင်းရင်း မပြည့်သေးတဲ့အိုးထဲ အမြဲပဲ ဖြည့်သွင်းရင်း ............... (17.9.2019) 8:50 PM

ကလေးရေ ...... ကြုံလာတဲ့ လောကဒဏ်ကို အဖြေမရှိတဲ့ ပုစ္ဆာလို ပဟေဠိ အဖြေ မညှိချင်တော့လို့ မထူးဇာတ် မင်း မခင်းချင်ပါနဲ့ ........ ဘဝ ရဲ့ မျှော်လင့်ခြင်း အတွက် တစ်လှမ်းချင်း မင်းလျှောက်ရမယ် ...... ဒုက္ခများနဲ့  ခါးသက်သက် နေ့တွေထက် ချိုမြိန် နေ့ရက်တွေနဲ့ မိတ်ဖွဲ့ပြီးမှ မင်းခရီးဆက်ပါ ........... ဘဝခရီးလမ်းထက် လဲကျတဲ့အခါလည်း ပြန်ထဖို့သာ လိုလိမ့်မယ် လျှောက်တဲ့လမ်းတိုင်း ‌ဖြောင့်တန်းစေဖို့ ကိုယ့်ကိုယ်တိုင်သာ ကြိုးပမ်းရမယ်လေ ..... ဘဝသင်ခန်းစာ ကျေညက်အောင် သင့်လျော်တဲ့ စာများလည်း မင်းဖတ်ရလိမ့်မယ် အဲဒီအတွက်တော့ မင်းအချိန်လေးပေး ..... ဒါမှ စိတ်ထားပြည့်ဝတဲ့သူတွေရဲ့ အပြုအမူတွေနဲ့ စိတ်ထားတွေလည်း မင်း သိလာပါလိမ့်မယ် ..... ပန်းတိုင် ရောက်ပြီးရင်တော့ စာနာစိတ်ကလေး ကိုယ်တွင်းမှာမွေး အားနည်းတဲ့ဖက်မှာ ရပ်ပေးလို့ လူတွေကို ဖေးမတဲ့လက်၊ ဆွဲထူမဲ့ လက်တစ်စုံနဲ့သာ ကယ်တင်ဖို့ မင်းသတိရပါ ........... (1.9.2019) YGN

တမိုးသောက်လို့ တစ်နေဝင်ခဲ့ပြီ တစ်နေ့တာမှာ လည်ပတ်စွမ်းအား ရှုတ်ထွေးမှုများ ရှင်းအောင်ပြုလို့ အမောများလည်း ပြေစေခဲ့ပြီ ........... ထို့နောက်တဖန် နေ့သစ်အတွက် မင်္ဂလာရှိစေ အားအင်ပြည့်စေ အပြုံးတစ်ခု လက်နက်ပြုကာ လျှောက်ရပေဦးမည် ............ ဦးတည်ရာသို့ သွားရာလမ်းမှာ သတိတစ်ခု နေ့စဥ်ပြုလို့ နီတိ လိုက်နာ ကျင့်သုံးမှန်မှ ဘဝတာမြင့် ဘဝင်တင့်စေ ............ လောဘ မူလ သဘာဝကား ပြည့်ရိုးထုံးစံ မရှိသည်မို့ ရောင့်ရဲ ခြင်းနှင့် ဆန့်ကျင်ပြီ .......... မရှိမရှား ပီတိစားလည်း အားရှိဘိသို့ ခံယူချ င်လည်း မရှိရှားတော့ ပီတိမစားနိုင်တာ သဘာဝမို့ ကတိစကားများလည်း ရေပေါ်အရုပ်ရေးခဲ့သူလို လောကပါလဆန့်ကျင်ပြီ ............... ထိုဖြစ်စဥ်အား ‌စောကြောသုံးသပ် မြင်မိသည်ကား လောဘသမား ပီတိမစား အားမရှိတာမို့ အားအင်ပြည့်ဖို့ ပီတိဆေးသာ မှီဝဲရန်ဟု .................. (20.8.2019) 12:00 AM

သူ ပေးခဲ့သမျှ အရာရာတိုင်းဟာ ကိုယ့်အတွက် ခွန်အားများစွာ ............. မရေရာတဲ့ ကိုယ့်စိတ်များဟာ သူပေးတဲ့ အသိတစ်ခုကြောင့် ရှင်းထုတ်ကာ လွတ်မြောက်ခဲ့ရ လောက လမ်းမှာ......... ဒီလိုနဲ့ပဲ ဘဝတစ်ခုရဲ့လမ်းမှာ လိုပါတယ် ကိုယ့်အနီးနားမှာ အလင်းပေးမဲ့ အလင်းရှင်သာ ............ အရာရာ သူပိုင်စိုးလို့ ယုံကြည်အားကိုး ပိုတိုး၍သာ အနက်ရှိုင်းဆုံး တစ်နေရာမှာ တန်ဖိုးထားရင်း နေထိုင်ဖို့ ကြိုးစားရာ ............ ဒီလိုနဲ့ ရှင်သန်ရာ ခိုလှုံရာ ကမ္ဘာငယ်ဟာ နှစ်လိုစရာများနဲ ပြည့်ဝစုံလာ မနက်ဖြန်တိုင်း အတွက်မှာ အားသစ်များနဲ့ လူသားတစ်ယောက်အဖြစ် တည်ဆောက်လို့သာ ............... (18.8.2019) YGN

ဘဝဆိုတာ ရှိတော့ရှိတယ် အရှိမဲ့လို အလင်းဖျော့တဲ့ ကောင်းကင်ကြီးနဲ့ မမြဲခြင်းတရားကို သတိမူရင်း ............ အတုအယောင်တွေက ကြီးစိုးချိန် အစစ်အမှန်တွေကတော့ ယုံကြည်ချက်ကို ဖက်တွယ်ဆဲ လေဆန်ကို အန်တုလို့ ဘုရင့်နောင် ဖောင်ဖျက် ဆက်လျှောက်ဆဲ ........... တစ်နေ့ တစ်လံ ပုဂံဘယ်မှ မရွေ့တာမို့ ကိုယ့်ကြမ္မာ ကိုယ်ဖန်တီးလို့ရယ် အဆီးအတားများ ရှိနေလည်း သွားလိုရာလမ်းမှာ ကိုယ့်မူကိုယ့်ဟန်နဲ့သာ ငါ ........ ဆက်လျှောက်မယ် ...... ကြွေပါစေ မျက်ရည်များလည်း ဒီလောကဒဏ်တွေ ကျော်ကာဖြတ်လို့ ရနံ့ကြိုင်သော ပန်းလေးတစ်ပွင့်လို ထာဝရ မဟုတ်တောင် ဝေလည်းမွှေး ကြွေလည်းမွှေးစေ .............. (6.8.2019) 7:15 AM

ကိုယ့်အကြောင်းနဲ့ ကိုယ်ပါပဲ တန်ဖိုးထားရာ ကိုယ့်ကမ္ဘာမှာ အရာရာ မင်းသဘောနဲ့ ယုံကြည်မျှော်လင့်လို့ ............ ထားခဲ့ ............မရေရာခြင်းတွေကို လျှောက်ကြမယ် ရဲရင့်မှုတွေနဲ့ ရပ်တန့်လို့မသွားပါ ဇွဲမာန်ထည့်လို့ နှစ်ယောက်တူတူပဲ ........... လွန်မြောက်လာပြီပဲ အလင်းမဲ့နေ့တွေ ရောင်နီဖြာတဲ့ မနက်ဖြန်ဟာ နွေးထွေးမှုနဲ့ ကြိုကာစောင့်လို့ ရှေ့ဆက်သွားကြဖို့ လိုပြီလေ ................. မေ့လိုက်တော့ ....... မခံချင်အောင်ပြောစကားတွေ မဆုတ်မနစ်နဲ့ ကြိုးစားလို့ ပြစမ်းမယ် သူမတူ တမူထူးကာရယ် ကိုယ့်သမိုင်း ကိုယ်ရေးကြတာဖြင့် ရာဇဝင်မှာ တင်ကျန်ရစ်စေ ............ (26.7.2019) YGN

ငှက်ကလည်း သူ့အတောင်ပံနဲ့ ပျံသလို လူမှာလည်း သူ့အကြံ သူ့ဟန်နဲ့ပဲ ဘဝပေးတွေ မတူကြတဲ့အခါ ရပ်တည်ကြပေါ့ ယုံကြည်ရာ ............... ‌‌ဟေ့ .......... လူ့ဘဝမှာ အကျိုးအကြောင်း အဆိုးအကောင်းများဟာ ပြုခဲ့တဲ့အတိုင်းသာ ဖြစ်ပျက်လို့နေတာ ဒီနေ့ရဲ့ပြုခဲ့တဲ့ ကောင်းခြင်းများဟာ တစ်နေ့နေ့တော့ဖြင့် ရရှိလိမ့်မှာ စိုက်ခဲ့တဲ့အတိုင်းသာ ........... ဒါကြောင့်မို့သာ အယောက်စီတိုင်းဟာ ကောင်းကျိုးရအောင်အလို့ငှာ ကိုယ်စိတ်နှပါး ဖြောင့်မတ်မှန်စွာ ကြိုးစားကြရမှာ ............. (20.7.2019) YGN

နေ့ရှိသမျှ လူသားဘဝတွေ ရုန်းကန်ရင်းနဲ့ ......... တစ်ချို့တွေဘဝက လှပ လို့ တစ်ချို့တွေက ဒုက္ခနဲ့လက်တွဲ တစ်ချို့ တစ်ချို့ က မယောင်ရာဆီလူး ခုတ်ရာတနေရာ ရှရာတလွဲ မြင်ရကြုံရ ခဏခဏ ........ မွေးဖွားလာပုံချင်းက မတူလေတော့ အခြအနေမတူ အမြင်မတူ အတွေးမတူတာက လောက အမှန်တရားတစ်ခုဆိုတော့ သြော်.....ကြည့်ကြည့်သမျှ မေတ္တာတရားက နေရာအထားမှား ဂရုဏာတရားက တလွဲဆံပင်ကောင်းလို့ မြင်နေရတာ ရေလိုက်လွဲနေကြတာလား .......... လူသားနဲ့ဘဝ စာနာမှုက အခြေခံကျသမို့ တစ်ဘဝ တစ်ခဏ ရောက်လို့လာခိုက် ဖေးမလို့တွဲကာ နိုင်သူကူလို့ ပြေလည်မှုကို ရှာဖွေကြစို့........... အို............ မတွေးချင်ဘူးဆိုပေမဲ့ အသိစိတ်က နေမရ ငါ .... အနေအစားချောင်ပေမဲ့ အားနည်းသူကို ဖေးမလို့ကူချင် ဂရုဏာတရား ထုတ်ကာမကြွားလို မေတ္တာလိုသူ မေတ္တာရဖို့အဓိကမို့ ရပ်တန့်မနေ ကိုယ်စွမ်းသလောက်တော့ ကိုယ်ကြိုးစားဖို့ ငါ အားတင်းယင်း အနာနဲ့ဆေး တည့်အောင် လုပ်ဆောင်ကြမယ်လို့သာ..........   (16.6.2019) 6:50 PM Photo Credit - Google Image

ငါတို့ရုန်းရမယ် နက်ချင်သလောက် နက်လိုက်စမ်းပါ ကြုံလာသမျှတွေကို ရင်ဆိုင်မယ် အားကုန်ရယ်ထုတ်လို့........ ကံကြမ္မာ ရဟတ်က သူ့အလိုကျ လည်ပတ်လို့ အနိမ့်အမြင့်ရယ် မတူ တစ်နေ့တော့ရယ် အမြင့်သို့ရောက်မယ်ဟဲ့ အားမလျှော့စတမ်းကွဲ့ ........... ကြိုးစားကြမယ် ညီ/ညီမငယ်တို့ နောင်တစ်ချိန် ဒီလိုရယ်ဘဝတွေနဲ့ ဝေး ဝေးနိုင်သမျှ ပြေးပြေးကြမယ် ...... ခုချိန်ကစ ............ ပြင်ရမယ် ဒီအမူအကျင့်ကိုပ မကောင်းတာ တို့မယူပါဘူးရယ်လို့ အကောင်းကိုသာ မျှော်တွေးလို့ ကောင်းကျိုးလိုရာ ပြုကြမယ်ကွဲ့........ မက်ကြစို့ မျှော်လင့်ချက်အိပ်မက်တွေ တစ်နေ့တော့ရယ်  တို့တွေ အိပ်မက်က တကယ်ဖြစ်လာမှာမို့ အတိတ်သမိုင်းလည်း မရိုင်းရအောင် ဆင်ခြင်ပါမှ အနာဂတ်က လှ လိမ့်မယ်  ....... (11.6.2019) 10:15 PM

အတိတ်ကံ ရယ် မတူတော့ လာခဲ့တဲ့လမ်းတွေလည်းမတူ တစ်ချို့က တစ်နေ့တခြား ကြီးပွား တစ်ချို့က တစ်နေ့တခြား ငြီးတွား ........... အထည်ကြီးပျက် တဲ့ အထုတ်အထည်ပျက် ပျက်လိုက်သမှ စည်းစိမ်တွေ တဖြုတ်ဖြုတ် တဖြည်းဖြည်းချင်းမဟုတ် နေ့ချင်းညချင်း အခြေအနေက အနှုတ်လက္ခဏာပြ ဘာမှ မဖြစ်နဲ့ ဒါတွေက တစ်ခဏ....... တစ်ချို့က ဆင်ပိန်တော့ကျွဲ ဒီထက်ပိန်တော့လည်း ဘာဖြစ်အုံးမလဲ တကယ်တော့ လာရာလမ်းမတူပေမဲ့ သွားမဲ့လမ်းက တစ်ခုတည်းရယ် သေလွန်ပြီးနောက် ယူသွားစရာ ဘာမှမပါ ပါဘူး........ ဒါပေမဲ့ သေရာပါမဲ့ အရာတွေကတော့ ပြင်ဆင်ထားရမပေါ့ မတ်တပ်စာကို မတွယ်တာ တုံးလုံးစာတော့ ပြင်ဆင်ထားဖို့ အသိသတိရှိရှိနဲ့ ဆင်ခြင်ပါမှ သွားမဲ့လမ်းက ဖြောင့်လိမ့်မှာ.......... (6.6.2019) 11 : 10 PM

မာနက မိုးထိမြင့်နေတော့ အမှန်မြင်ဖို့ရာခက်လှ ဒီအတ္တနဲ့ ဒီမာန ခဝါမချသရွေ့ လျှောက်ရတဲ့ ဘဝလမ်း ဖြောင့်တန်းဖို့မမြင်...... ကွေးသောလက် မဆန့်မီ ဆန့်သောလက်မကွေးမီ ရုတ်တရက် နှုတ်ဆက်ထွက်ခွါ ဒီတစ်လမ်းပဲ ရှိတာ  ...... မြန်နှုန်းမတူပဲ ပြေးလမ်းထက်ဝယ် မနေ့ကထက် တစ်နေ့ပြီးတစ်နေ့ ပိုပိုနီးလာ ပန်းတိုင်ကို ဘယ်သူ အရင်ဦးမယ်ဆိုတာ မသိနိုင်တဲ့အရာ...... ခဏတာရောက်လာ ဒီဘဝမှာဖြင့် အတ္တနဲ့ မာန ခဝါချကာ ကိုယ်စိတ်နှလုံး ရွှင်ပြုံးကြည်လို့ လူသားပီသစွာ နေထိုင်ကြရင်း အမုန်းတရား မပွားကြစေ ချစ်ခြင်းတရားများ တိုးပွားကြစေသား ........ (8.5.2019) YGN

လိုတာထက် မပိုပါနဲ့လေ မျှော်လင့်မိသမျှ ဒီဘဝ ပြည့်ဝဖို့အရေး ဒီလိုပဲ တွေးကြံပြုမူနေထိုင်ပါ ..... တစ်နေ့တော့ ရောက်မှာပေါ့ ကြိုးစားသူထံ ရောက်မှာဧကန် ရိုးရိုးကျင့်မြင့်မြင့်ကြံ ဘဝဟန်ပန် တင့်တယ်စွာ ရည်သန်လို့ အားမလျှော့စတမ်း ...... ခဏတာရောက်လာ ဒီဘဝမှာဖြင့် လူတွေရယ် အမှားနဲ့မကင်းနိုင်တာ သဘာဝပေမို့ ထိုစဉ်အခိုက်မှာ ဒီလိုအမှားမျိုးရယ် ထပ်တူမရှိရလေအောင် ဒီလူရင်မှာ ဆင်ခြင်ပါမှ တော်ကာကျလိမ့်မပေါ့ ....., လူအချင်းချင်း မထောက်မညှာ  အရောက်လာ လှည့်ပတ်ကာ  နှလုံးစိတ်ဝမ်း မအေးမချမ်း အထင်ကြီးခြင်းမကြီးခြင်းအား အလေးမထားအမျက်မပွား သူတော်ကောင်းတရားသာ ခြုံလွှမ်းကြစေသား ..... (1.1.2019) YGN 

စံတွေလွဲမှား ငါ့ဘို့သမားတွေကြား ဖွင့်ထားတဲ့စိတ်တစ်ခုနဲ့ အရာရာမှာအံဝင်ခွင်ကျ လူမှုဘဝတွေထဲမှာ ကိုယ်နေထိုင်ပါတယ် ..... ။ အနေအထိုင်တတ်ဖို့ကြိုးစားရာမှာ အတ္တနဲ့မာနကိုခဝါချ ကြုံလာသမျှတွေဟာ သင်ခန်းစာအသစ်လို့မှတ်ယူ သင်ယူလို့မဆုံးခင်မှာပဲ ဟောနောက် တစ်ခုရောက်လာ သို့ပေမဲ့လဲ အမှားမကင်းနိုင်ကြတဲ့ နိယာမလူ့သဘာဝကိုလက်ခံ နာကျင်စရာတွေကိုနေရာမပေး နှလုံးအေးအောင်နေကြစို့လား .....။ (28.4.2019) YGN