Thet Tant Hlwar (သက်တန့်လွှာ)

2019 ရဲ့ အဆုံးသတ်ရက်နေ့ နှစ်ဟောင်းရဲ့ ကောင်းခြင်းဆိုးခြင်း သုံးသပ်ဆင်ခြင် 2020 နှစ်သစ်အတွက် အားမွေးပြင်ဆင်ယင်း……. --------------------------------------------------------------- လူသားအချင်းချင်း ထက်အောက်ဖိနှိပ် ကောက်ကျစ်ယုတ်မာ စိတ်မသမာဖြင့် ဟန်ဆောင်ဖုံးကာ နှလုံးမလှ မရှိကြစေ…. ကိုယ်ချင်းစာတရား ပွားများကျင့်ယူ ပြုံခြင်းပညာ မေတ္တာများစွာ ပျော်ရွှင်မှုမှာ လွတ်လပ်စွာ စကားအရာ ရိုးသားစွာ စွန့်လွှတ်မှုမှာ မျှော်လင့်မပါ ပေးဆပ်မှုမှာ အေးမြကြည်စွာ လဲလျှင်ပြန်ထ ဘဝဆန်စွာ မှား/မှန်တွေမှာ သင်ခန်းစာ များစွာ ကျင့်ကြံနိုင်ကြရန် ..... မိမိကိုယ်တိုင် မိသားစုများ လုပ်ဖော်ကိုင်ဖက် မိတ်ဆွေချစ်သူ စိတ်တူကိုယ်တူအားလုံး….. အားလုံးအတွက် ဆန္ဒမွန်ဖြင့် လျှောက်လှမ်းကြစို့ တောင်းဆုခြွေပါတယ်။ TTH (31.12.2019)

တကယ်ပါ ​ ကိုယ် မပြောင်းလဲပါရစေနဲ့ ပြောင်းလဲခြင်းထဲမှာ တယုတယ ထုဆစ်ထားတဲ့ ကိုယ်တို့ရဲ့    ချစ်ခြင်းအတွက် အဓိပ္ပါယ်မဲ့   သေဆုံးသွားမဲ့ အတ္တတစ်ချို့က   ခါးသက်တဲ့ နက်ဖြန်များဆီ   တွန်းပို့စေနိုင်တာ  .... ။ ဝေဒနာ မဖြေသာမှတော့ ရင်ဝယ်လှိုက်မော စိတ်တွေစောလို့ ဘ၀လမ်းက ဆူးခလုတ် မငြိအောင် ကိုယ် မစွမ်းဆောင်နိုင်မှာ  တိုးတိတ် စိုးစိတ် ဖြစ်မိတာပါပဲ.....။ နားလည်ပေးပါ  အသက်ထက်ဆုံး မပြောင်းမလဲပဲ စိတ်တူကိုယ်တူ တိုက်ပွဲအလီလီ ဝင်လာသမျှ  ခါးစည်းခံလို့ ခိုင်မြဲလက်တွဲ အောင်ပွဲဆီသို့ ချီတက်ကြမယ်လို့....။ (27.12.2019) THU

ညညတွေဟာ   တိတ်ဆိတ်လွန်းလှ တွေးချင်ရာတွေး   ဆွေးချင်စရာ ကိုယ့်အတွက်   အကြောင်းပြချက်မဲ့ အဟောင်းတိုင်း   အကောင်းတိုင်းရှိနေသေးတဲ့ နှလုံးသားတစ်စုံနဲ့   ဒီချိန်ဆို   ကြုံလာနေကျ အမှတ်ရစရာတွေက   တိုက်ဆိုင်လွန်းလှတယ် .....  တစ်စုံတစ်ရာဟာ   တစ်စုံတစ်ရာကြောင့်ပဲ ကိုယ်ပြုခဲ့မိသမျှ   တရားစီရင်ချက်မှာ အပြစ်သားတစ်ယောက်သာသာ မဖြစ်ချင်ပေမဲ့လဲ   ဝဋ်ကြွေးရှိက ဒီဘဝ   ဒီမျှနဲ့ကျေပါစေ .....  ဆန္ဒလိုအင်ဆိုတာ   ကိုယ့်အတွက်တော့ ဒီထက်ကို   မပိုတော့တာ   လေးနက်မှုကို   ပမာပြုလို့ ရင်ထဲမှာ   ပန်များနဲ့   ပွင့်စေ   ဝေစေ ကြေကွဲစရာများ   အမြဲလွင့်စင်စေ .....  (25.12.2019) Wed

မိုးမပြို ပြိုခဲ့သည်ရှိသော် ငါ... ကြောက်မိတယ် အတွေးတွေကြောင့် ယုံကြည်မှုက ဟိုး အောက်ထိ ပြုတ်ကျ ဆွဲတင်ရတာလဲ ခဏခဏ .....။ တည်ငြိမ်အောင် ကြိုးစားရင်း အမှန်ကို မြင်လို့ မကျက်သေးတဲ့ဒဏ်ရာကို အသားတက်အောင်  စောင့်ရအုံးမယ်လို့ .....။ ရာသီတွေ လည်ပတ် အဆုံးမှတ်က ဘယ်မှာ ဒီလိုနဲ့ တစ်နေ့ပြီးတစ်နေ့ ရှင်သန်ရာ ဘဝတွေမှာ ..... ​နှစ်ထောင်းအားရစရာ  အခါခါသာ ရှာရင်း ရှင်းရလို့ ရှင်းလွန်းတဲ့လမ်းမှာ ဟာတာတာ ရင်မှာစုလာလည်း မယိုင်မနဲ့ လျှောက်နေဆဲပါ .....။ (20.12.2019) YGN

လှမ်းလာတဲ့ လက်တစ်စုံအတွက် တွေဝေစရာ နောက်ထပ်မရှိတော့တဲ့ခါ ဆွဲကိုင်စရာ လက်တစ်စုံဖြစ်လာတာ  ..... ဆွဲထူ တွဲကူခြင်းနဲ့ ရှင်သန်ရာ ကမ္ဘာမြေတစ်နေရာမှာ  လောကီ၊ လောကုတ် နှစ်ဖြာကောင်းကျိုး တိုးပွားစေကြောင်း အားသစ်လောင်းကာ ဓိဌာန်အောင်စေ တို့ဆုတောင်းမလေ ..... အပြုံးချိုမြ လိုက်ဖက်လှစွာ စိတ်ဝယ်ချိုအေး ငြိမ်းလို့ကြည်သာ မေတ္တာနှလုံး အစဉ်သုံးကာ ပြုမြဲ သစ္စာ တည်စေသားလို့ ဆုတောင်း ခါခါ ရှိစေတာ ..... (၁၇.၁၂.၂၀၁၉) ရန်ကုန်

ဒီဇင်ဘာရဲ့ ဆောင်းလေရူးဟာ မနှစ်ကထက် ပိုလာရဲ့ ဥတုရာသီတောင် အစွန်းရောက်နေမှ လူသားတွေ အစွန်းရောက်ကြတာ ဘာဆန်းသလဲလေ ..... မမြဲခြင်းတရားဟာ နေရာတကာ ချစ်ခြင်း နဲ့ မုန်းခြင်းဟာလဲ နေ့မြင်ညပျောက် မမြဲခြင်းထဲပါနေရဲ့ ..... တရားမရှိဘူးပဲဆိုချင်ဆို ခုဆို ငါ ..... မြင်မြင်သမျှ အထာမကျတော့ ..... ရုန်းကန်မှုတွေနဲ့ စိတ်ပျက်လက်ပျက်  ဘ၀ကြီးထဲက မမြဲခြင်းတရားကိုဆန့်ကျင်လို့ တစ်ခဏမဟုတ်  ထာ၀ရသာ ပြေးထွက်ချင် ..... 15.12.2019 (YGN)

ထပ်တူညီမှု   အကြောင်းပြုလို့ ဝမ်းနည်း   ဝမ်းသာ   ရှိချိန်တူမျှ ဖေးမကူကာ   ရပ်တည်မြဲလေ .....  ။   အရောင်တွေလည်း   မပြောင်းနဲ့ ဆန္ဒပြည့်ဝ   နှလုံးလှဖို့ စိတ်ဝယ်   ရှင်းလို့   နားလည်မှုလည်း   ထပ်တူထားကာ ရှေ့သို့ချီတက်   အားမာန်နဲ့လေ .....  ။   ဘဝတိုတို   ဆုံတွေ့ချိန်ကို သူ့ကျိုး   ကိုယ့်ကျိုး   ကောင်းရာပြုလို့   တန်ဖိုးသိစေ   မေတ္တာဝေမျှ တူတကွမို့  ကျောက်ဆောင်ပမာ ခိုင်မြဲခြင်းကို  ရှေးရှုရာ  .....  ။ (6.12.2019) YGN

ပြန်မလာမယ်မှန်း   သေချာနေတာတစ်ခုက ပြင်ဆင်ချိန်များနဲ့တူ   ခံနိုင်ရည်စွမ်းမြှင့်လာပြီ .....  လွှတ်ချခဲ့ပြီးနောက်မှာ   အဝေးကလွမ်းယုံ   သက်သက်ပဲဟာ ဒီထက်လွတ်လပ်တာ   ရှိနိုင်အုံးမလား ..... ကိုယ်အပိုင်သိမ်းထားတဲ့   အလွမ်းများ ထုတ်ထုတ်ကြည့်တာ   တစ်နေ့တစ်ခါ ရိုးမသွားတာသေချာ..... ဘယ်သူတွေ   ဘာပြောပြော ယူတို့နှလုံးသား   ကိုယ်မငှားပါဘူးလို့ ကိုယ့်အကြောင်းနဲ့ကိုယ်သာ ....  (30.11.2019) YGN

ရဲရဲရင့်ရင့်နဲ့     ပွင့်လိုက်စမ်းပါ ရှေးကုသိုလ် ကောင်းခဲ့လို့သာ ဒီဘဝမယ်   မျက်နှာမြင် ချစ်ခင်စေလို့ ပကတိအရှိကိုသာ   ရောင့်ရဲ ပူလောင်မှုကင်း   အေးချမ်းခြင်းနဲ့ ​ လျှောက်ချင်သူမို့   ကိုယ့်စိတ်ထဲဝယ် သူ့တွက်   ကျေနပ်ပီတိ   ဖြစ်ရတယ်  .....    ။ နောင်တချိန်တွက်   လောကကြီးမှာ ချန်ရစ်ခဲ့စရာ   သူ့စေတနာနှင့် သူ့မေတ္တာများ   ဆက်လက်တည်တံ့ ခိုင်စေသားလို့   သစ္စာတရား ဦးထိပ်မှာထား   လုံ့လအမြဲစိုက်လေသူမို့ ....  ကိုယ့်အဖို့မှာတော့   လောကတစ်ခွင်မှာ အစားထိုးစရာ   နောက်ထပ်မရှိတာ ပင်မြင့်စံနန်းမှာ   ရနံ့ထုံသင်း ဂုဏ်သတင်းမွှေးလို့   မှတ်ယူမိသည် ရင်ဘတ်ထဲက   အိုနှင်းဆီ .....    ။ ( 29.11.2019 ) YGN

သံယောဇဥ်   လက်ကျန်လေးကို တစ်စစီ   ကောက်သိမ်းလို့ အိပ်မက်က   လက်တွေ့ဖြစ်မလာတဲ့အခါ အမှတ်မထင်နဲ့   တို့တွေဝေးဖို့ဖြစ်လာတယ် .....  ။ ချည်မိတဲ့ကြိုးက   ဆွေးမြည့်ကုန်တော့ နောက်ဆုတ်ကြရင်းပဲ   ပြတ်သွားခဲ့တာလား လျော့လွန်းလို့   လွတ်ထွက်သွားတာလား ငါ့မှာ   ဖြေရှာ   မောလာပြီ  ..... ။ အဖြေမဲ့ပုစ္ဆာ   ဖွေရှာမောချိန် မရေရာတဲ့   ခရီးလမ်းတွက် ဇာတ်သိမ်းလှမလှ   မသေချာလှသမို့ ​ လမ်းခုလတ်က   လှည့်ပြန်ထွက်ခဲ့တာ နာကျင်စရာများလည်း   အားမကြီးခင် တို့တွေ   ဝေးကြတာပဲ   ကောင်းပါတယ်လေ  ..... ။ (22.11.2019) YGN

ဘယ်သူက ဘယ်သူ့အတွက် ဖြစ်တည်ခဲ့တာလဲကွယ် တစ်နေ့သွားရမဲ့ လမ်းတူတူ ဘိန်းစားချင်းတူတူ တစ်မူးပိုမရှူချင်ပါနဲ့ ..... လောကကို ဆေးရောင်ခြယ် စိတ်ရဲ့အလှနဲ့ တန်ဆာဆင်ကြလို့ ပွင့်သောပန်းတိုင်း လန်းဆန်းချိန်မှာတော့ အလှပဆုံးနဲ့ စက္ခုပသာဒရှိစေမှာအမှန်မို့ ..... နွေမိုးဆောင်းတို့  ပုံမှန်လည်ပတ်လို့ တစ်နေ့ထက်တစ်နေ့ ခြေလှမ်းများ လေးလံမလာစေဖို့ အစကောင်းလို့ အဆုံးတစ်နေ့အတွက် ကျန်ရစ်မဲ့ သမိုင်းလှလှတစ်ခု ချန်ရစ်ကြပါစို့ ..... (19.11.2019) YGN

ကံကြမ္မာရဲ့   သံသရာစက်ဝိုင်းထဲ နေထိုင်   လည်ပတ်ခဲ့သမျှ ဒုတိယလူ   အဖြစ်နဲ့လဲ စွမ်းသလောက်တော့   ရပ်တည်ကြိုးစား ...... ကျေနပ်ပါတယ်လေ  ...  အမှတ်မရှိတဲ့   အသည်း မမာနိုင်လွန်းတာလည်း   ကိုယ့်အားနည်းချက်လို့ ဘေးလူထင်တာ   ဘာဆန်းသလဲလေ ....  တကယ်တမ်းတော့   မေတ္တာတရားတို့   ကြီးစိုးရာ အရာရာကို   နားလည်ပေးလို့ ဥပက္ခတရားနဲ့သာ အနေတတ်ဖို့   လေ့ကျင့်ရင်း .....  အတ္တကို   မြင်အောင်ကြည့်လို့ အေးချမ်းသော   လမ်းပေါ်ကသာ လျှောက်နေမိသူ   တစ်ဦးမို့ ကိုယ့်အတွက်တော့   နေရာက အဓိက   မကျတာ   သေချာနေခဲ့တာ ..... (17.11.2017) YGN

အနားနား   ရှိစဥ်ခါက   လှုတ်ရှားမှုတိုင်းက   ရင်မှာသက်ဝင် နွေအခါပင်   ပူတယ်မထင် ခုကျတော့   အေးတမြမြနဲ့ ဆွေးရပြန်တယ် .....  ကြယ်ကြွေချိန်တိုင်း   ဒီဆုတောင်းလေးပဲ မပြည့်မချင်း   တောင်းနေမှာလို့ ....  လွမ်းနေခွင့်လေး   ပေးခဲ့တာပဲ   ငါလေ   ကျေးဇူးတင်မိတယ် ...  ဒါကြောင့်လေ အလွမ်းစိတ်ကို   လွမ်းရင်းနဲ့ပဲ   ဖြေနေရပေါ့ ......    (12.11.2019) YGN

ဆွဲဆွဲနှုတ်ပစ်ယုံနဲ့   အတိတ်ကပြောစကား ပျောက်ကားပျောက်မသွား ....  တွန့်ဆုတ်တွေဝေခဲ့လို့ ​ ကယ်သူသာမော နောက်ဆုံးရထား မှီမှမှီပါ့မလား မင်းစဥ်းစားဖို့ နောက်ဆုံး   မိနစ်ပဲလို့  .....  နာကျင်ချိန်ပို ပေးမယ်မပေးဘူးဆိုတာ ဘဝက   သေချာပါ့မလား  .....  ကစားကွက်လှလှလေးသုံးလို့ ခြေပေါ်အောင်ဆော့နိုင်ဖို့ မင်းကြိုးစားစမ်း  ...... 11.11.2019 (YGN)

နှစ်ခါပြန်မရတော့တဲ့   အခွင့်အရေးတွေကို   မေ့ပစ်ပြီးတော့ မင်းရဲ့   အဝန်းအဝိုင်းမှာ   ခိုဝင်နားလို့ ဘဝတစ်ခုကို   အစပြုဖို့   ကြိုးစားဖူးတယ်   ပေးဆပ်မှုမှာ   ကိုယ်ပျော်မွေ့လို့   အားနည်းသူကိုမှ   ထူမတ်ပေးဖို့ အကောင်းဆုံးလမ်းကို   ရွေးမိသူဟာ တံလျှပ်ကိုရေထင်ခဲ့တဲ့   ရွှေသမင်လို လက်တွေ့ဘဝနဲ့   စိတ်ကူးများက ခြားနားလွန်းတော့   ကိုယ်   မောလာတယ် တစ်နေ့ထက်တစ်နေ့   ကိုယ်ဟာ မင်းတို့အတွက်     အသုံးချဖို့သက်သက် ရုပ်ပြတစ်ခုသာသာပဲလို့     သိလာဖို့ အချိန်တစ်ခု   အရင်းပြုလို့ ကိုယ်တိုင်ရိတ်သိမ်းဖို့   ကိုယ့်ကိုယ်တိုင်ပဲ   စိုက်ပျိုးရင်း ..... ကိုယ်က   ပေးတိုင်း   ပြန်မရမှန်း သိခဲ့သလို   ရလိုမှုမပါ   အရောင်မပါ ဒါဟာ   ကိုယ့်   မေတ္တာလို့ ယုံကြည်မျှော်လင့်စွာ ကြုံဆုံခဲ့ရ တစ်ခဏရဲ့ အဆုံးသတ်က ဇာတ်သိမ်းမလှ အတ္တလှလှနဲ့ ‌‌ ‌တစ်ဘ၀စာ သင်ခန်းစာမှာ ဂုဏ်ထူးမှတ်နဲ့ နောက်ပြန်မလှည့်  ကျောခိုင်းထွက်ခဲ့ တာ ယနေ့ထိပေါ့  ..... (7.10.2019) Monday

လုပ်ရပ်က   လုပ်ဇာတ်ဖြစ်နေတော့ ပွဲသိမ်းကောင်းအောင်တော့   ကြည့်ထိန်းပေါ့   အို  ....  ဇာတ်ဆရာ ဇာတ်သိမ်းခန်းတော့   လှပါစေရေး ငါတွေးရင်း   မောလှပေါ့ ဘေးကမထိုင်   ဘုလည်းမပြော ဂဏန်းလိုလူတော့   မဟုတ်တာ ငါ့ကိုယ်ငါ   သေချာလို့  ...... အရိုးခံ   စိတ်ရင်းဟာ   မကောင်းသူဖယ်လို့   ကောင်းသူကယ်စေ ဆုမွန်သာခြွေမိတော့တာ  ..... (၅.၁၀.၂၀၁၉) ရန်ကုန်

မိုးပေါ်ကို မော့ကြည့်တော့ ညရဲ့လက အေးမြမြနဲ့  သူ့လင်း သူဆောင်ကျဉ်းလို့ ......  လမိုက်ညရဲ့ တိမ်သားကင်းစင်  အာကာတခွင် ကြယ်ကလေးများလည်း  စွမ်းသလောက်နဲ့ ကမ္ဘာမြေကို  လင်းစေတာပင် ..... ​ သူ့အလင်းနဲ့ သူ့အချင်းက ညအမှောင်ကို ထိုးဖောက်ခွင်းလို့  တစ်နေ့တာ မောခဲ့သမျှ  လမင်းကို ငေးရင်း  ကြယ်တွေကို ရေတွက်ရင်း  တိတ်တဆိတ် ည များစွာ  ကျော်ဖြတ်ကာနဲ့  ရက်လနှစ်တို့ ကုန်မြန်ခဲ့တာ  ငယ်စဉ်ကနဲ့ မတူတာ  တစ်နေ့ထက် တစ်နေ ပိုပိုသေချာလာ ...... ပိုကောင်းမဲ့ မနက်ဖြန်များအတွက်  ကမ္ဘာမြေအတွက် လင်းလက်စေမဲ့  ကြယ်တစ်ပွင့်ကဲ့သို့ ဖြစ်ချင်မိဆဲ  ဖြစ်ချင်တာနဲ့ ဖြစ်နေတဲ့ကြား သဟဇာတ မျှအောင်သုံးသပ်လို့  ချစ်ခြင်းများလည်း တူတကွဝေမျှ  တစ်ယောက်လက်ကို တစ်ယောက်တွဲကူ  ရင်ဘတ်ချင်းတူစွာနဲ့  ဝေငှကြစို့ သူငယ်ချင်း ...... (1.10.2019) YGN

ငါ့မေတ္တာများက တခမ်းတနားနဲ့ ကြိုးစားသလောက် အရာထင်ခဲ့လို့ မမျှော်လင့်ခဲ့သော အသိအမှတ်ပြုခြင်းများ ငါလေပွေ့ဖက်လို့ ယုံကြည်အင်အားတို့ ယိုင်နဲ့ မသွားဖို့ ငါလေ အကြိမ်ကြိမ် အားတင်းလို့ ‌ရှေ့ဆက်ခရီးတွက် ခံယူချက်တို့လည်း ပြောင်းလဲမသွားဖို့ ...... (26.9.2019) YGN

ကြွေချိန်တန်လို့ ကြွေကျမြေခတဲ့ခါ သင်္ခါရရဲ့ သဘာဝငြင်းလို့မှမရတာမို့ လွမ်းရိပ် လွမ်းငွေ့ ဝေယုံမျှသာ  .... (24.9.2019) YGN